Ölüm kağızının dolanbac yolları
İqtisadçı, vətəndaş cəmiyyəti eksperti Samir Əliyev atasının ölümünü təsdiq edən həkim arayışını ala bilmir. Novator.az-ın məlumatına görə, Samir Əliyev özünün “Facebook” səhifəsində yazır ki, atası Oqtay Əliyev 2022-ci il dekabrın 28-i xəstəlikdən vəfat edib: “Ölüm kağızı adı ilə tanınan tibbi arayışı almaq üçün yaşadığımız Xırdalan şəhərindəki tibb ocağına – Ailə Sağlamlıq Mərkəzinə getdim. Qeydiyyat şöbəsindən ailə həkiminə, terapevtə yönləndirdilər. Terapevt dedi ki, atanız bizdə qeydiyyata düşməyib, mənim pasiyentim olmayıb, onun xəstəliyi barədə məlumatsızam.
İzah etməyə çalışdım ki, atam Tibbi Ərazi Bölmələrini İdarəetmə Birliyi sistemindəki xəstəxanalarda – Elmi-Tədqiqat Kardiologiya İnstitutunda, Respublika Klinik Xəstəxanasında müalicə alıb, həmin tibb ocaqlarında qeydiyyata düşüb. Onu da bildirdim ki, atam koronavirusa yoluxanda Xırdalan Ailə Sağlamlıq Mərkəzində qeydiyyata götürülüb. Faydası olmadı. Terapevt dedi ki, məhkəməyə müraciət etməlisiniz.
Abşeron Rayon Məhkəməsinə baş çəkdim. Görüşdüyüm vəkil dedi ki, əvvəl tibb ocağından imtina kağızı, sonra onun əsasında yerli polisin pasport-qeydiyyat qurumundan imtina kağızı almalıyam. Bütün bu işlər üçün 200 manata yaxın xərcimin çıxacağını bildirdi.
İmtina kağızı üçün terapevtə üz tutanda bildirdi ki, Abşeron Rayon Mərkəzi Xəstəxanasına müraciət etməliyəm.
Tibbi Ərazi Bölmələrini İdarəetmə Birliyinə zəng vurdum. Terapevtin dediklərini təkrarlayaraq atamın ölümünü təsdiq edən həkim arayışını almağın tək yolunun məhkəmə olduğunu bildirdilər.
İndi mən atamın rəhmətə getməsini sübut etmək üçün nə etməliyəm? Ölüm faktı var, təcili tibbi yardım bunu qeydə alıb. Atam Tibbi Ərazi Bölmələrini İdarəetmə Birliyi sistemində qeydiyyatda olubsa və xəstəxanalarda onun müalicəsi ilə bağlı məlumatlar varsa, niyə onun ölüm faktına dair tibbi arayış üçün məhkəməyə üz tutmalıyam?”
