Mərkəzi Parkın ikinci hissəsi açılıb
Prezident İlham Əliyev dekabrın 30-u Bakıda Mərkəzi Parkın ikinci hissəsinin açılışında iştirak edib.
Xəbəri AZƏRTAC yayıb.
Park Yasamal rayonunda yerləşir. Arayışa görə, keçmiş “Sovetski” adlanan ərazidə yol-nəqliyyat infrastrukturunun yenidən qurulması və abadlıq işlərinə 2013-cü ilin noyabr ayında başlanıb. Mərkəzi Park layihəsinin ən mühüm xüsusiyyətlərindən biri İsmayıl bəy Qutqaşınlı küçəsindən Mərkəzi Banka qədər olan ərazidə piyadalara yol keçmədən maneəsiz hərəkət imkanlarının yaradılmasıdır.
Təzə Pir məscidinin qarşısındakı yeni bağın və Füzuli küçəsi boyunca salınan Mərkəzi Parkın birinci hissəsi 2019-cu il mayın 22-də istifadəyə verilib.
Mərkəzi Parkın ikinci hissəsi üzrə layihəyə əsasən, Mirzəağa Əliyev və Bəşir Səfəroğlu küçələri arasında 6,4 hektar ərazi təmizlənərək abadlaşdırılıb, ən müasir infrastrukturlar və kommunikasiyalar çəkilib. Abadlıq və yenidənqurma işləri çərçivəsində ərazidəki torpaq səthi dəyişdirilib, 57 min 500 kubmetrdən çox münbit torpaq gətirilib.
Parkın ərazisinin 4 hektarında 19 növdə 2764 ağac, 20 mindən çox gül və kol bitkiləri əkilib.
İki istirahət və oyun meydançası da salınıb, söhbətgahlar quraşdırılıb və istirahət mərkəzinin birinci hissəsi ilə ikinci hissəsini birləşdirən yeraltı piyada keçidi tikilib.
Mərkəzi Parkın ərazisində iki açıq kafe, bir fəvvarə kompleksi və avtomobillər üçün açıq dayanacaq da fəaliyyət göstərəcək.
