Ağ Şəhər reydi
Bakı Ağ Şəhərin mərkəzi park kvartalında bir sıra tikililər, avtomobil yolları və digər infrastruktur işləri tamamlanıb. AZƏRTAC xəbər verir ki, dekabrın 27-də prezident İlham Əliyev görülən işlərlə tanış olub, Qarabağ Atları Kompleksinin təməlini qoyub.
Arayışa görə, mərkəzi park kvartalında müxtəlif ölçülü küçələr salınıb və yolaltı kommunikasiya işləri görülüb. Bunlar əsasən Qarabağ atları, 3-cü Şərq, 6-cı Park küçələri və digər küçələrdir. Bununla da Ağ Şəhərin daha iki küçəsinin Babək prospektinə rahat giriş və çıxışı təmin ediləcək.
Mərkəzi park kvartalı 2017-ci ildə təhvil verilmiş Paris evlərindən əlavə 36, 20 və 8 mərtəbəli yaşayış binaları, 6-cı Park küçəsi boyunca ikimərtəbəli qeyri-yaşayış binaları, ticarət və ictimai iaşə obyektləri, orta məktəb, ofis və dövlət inzibati binaları, park və yaşıllıq zonalarından ibarətdir.
Qarabağ atları küçəsinin mərkəzində, səkkizmərtəbəli yaşayış binalarının əhatəsində Qarabağ Atları Meydanı yerləşir. Meydanın mərkəzində Qarabağ atlarının heykəl kompleksi quraşdırılıb.
Bakı Ağ Şəhər layihəsinin təməli 2011-ci il dekabrın 24-də qoyulub.
