Yeni metro stansiyası
AZƏRTAC xəbər verir ki, prezident İlham Əliyev dekabrın 23-də Bakı Metropoliteninin “Xocəsən” elektrik deposunun və “Xocəsən” stansiyasının açılışında iştirak edib.
Bununla metropoliten stansiyalarının sayı 27-yə çatıb.
“Xocəsən” stansiyasından sərnişinlər “Avtovağzal”-“Memar Əcəmi”-“8 Noyabr” xətti ilə hərəkət edə bilər. Platformasının uzunluğu 144 metr olan stansiyanın Lökbatan qəsəbəsi və “Sədərək” Ticarət Mərkəzi istiqamətindən hərəkət edən vətəndaşların nəqliyyat problemlərinin aradan qaldırılmasında mühüm rol oynayacağı vurğulanır.
“Xocəsən” elektrik deposu Bakı Metropoliteninin ikinci deposudur və 24 hektardan çox ərazini əhatə edir.
Bakıda metro nəqliyyatı 1967-ci ildən fəaliyyət göstərir.
