Gültəkin Hacıbəyli prosesi təxirə düşdü
Nəsimi Rayon Məhkəməsi müxalif siyasətçi Gültəkin Hacıbəylinin işi üzrə prosesi təxirə salıb. Novator.az-ın məlumatına görə, dekabrın 16-da keçirilən məhkəmə iclasında Gültəkin Hacıbəyli və vəkilləri hakim heyətinə etiraz vəsatəti qaldırıb. Vəsatət qəbul olunmadığı üçün şikayət veriləcək və proses Bakı Apellyasiya Məhkəməsində baxışdan sonra davam edəcək.
Gültəkin Hacıbəylini vətəndaş Leyla Arif xüsusi ittiham qaydasında məhkəməyə verib, siyasətçinin Cinayət Məcəlləsinin 147.2-ci maddəsi ilə məsuliyyətə cəlb olunmasını istəyir.
147.2-ci maddəyə əsasən, ağır və ya xüsusilə ağır cinayətdə ittiham etməklə böhtan atma 2 ilədək müddətə islah işləri və ya 3 ilədək müddətə azadlığın məhdudlaşdırılması və ya 3 ilədək müddətə azadlıqdan məhrumetmə ilə cəzalandırılır.
Leyla Arif bildirir ki, Gültəkin Hacıbəyli “Facebook” şəbəkəsində yaydığı şərhdə onu separatçı adlandırıb.
1973-cü il təvəllüdlü Gültəkin Hacıbəyli 2000 və 2005-ci illərdə Milli Məclisin deputatı seçilib. Demokratik Qüvvələrin Milli Şurasının Koordinasiya Mərkəzinin üzvüdür.
Gültəkin Hacıbəyli niyə saxlanıb?
