Bakıdan Parisə cavab
Azərbaycanın Xarici İşlər Nazirliyi Fransa parlamentinin aşağı palatasının 30 noyabr qətnaməsinə münasibət bildirib.
Qətnamədə Azərbaycan Ermənistana təcavüzdə, Qarabağ ermənilərinin hüquqlarını pozmaqda ittiham olunub, Fransa hökumətinə münaqişə bölgəsində beynəlxalq sülhməramlı qüvvələr yerləşdirilməsi üçün diplomatik addımlar atmaq, Azərbaycana sanksiyaların tətbiqini nəzərdən keçirmək çağırışları və başqa təkliflər yer alıb.
Oxşar qətnamə noyabrın 15-də Fransa parlamentinin yuxarı palatasından da keçib.
Xarici İşlər Nazirliyi qeyd edir ki, Fransa Milli Məclisinin Azərbaycan əleyhinə yalan və iftira dolu qətnaməsi bir müddət əvvəl Senatda qəbul edilmiş qətnamə kimi Azərbaycana qarşı növbəti təxribatdır: “Qətnamə Azərbaycanla Ermənistan arasında münasibətlərin normallaşması prosesinə, habelə bölgədə sülh və əmin-amanlığın bərqərar olması səylərinə xələl gətirmək məqsədi daşıyır. Beynəlxalq hüququn norma və prinsiplərinə zidd olan bu qətnamə bir daha Fransanın qərəzli siyasi mövqeyini, beləliklə, bitərəf və ədalətli vasitəçi rolunda çıxış etmək iqtidarında olmadığını nümayiş etdirir.
Qətnamə üzrə dinləmələrdə Fransa hökuməti nümayəndəsinin faktiki olaraq qətnaməni dəstəkləməsi bu sənədin də arxasında son vaxtlar müxtəlif platformalarda anti-Azərbaycan təşəbbüslərlə çıxış edən Fransa hökumətinin dayandığını növbəti dəfə göstərir.
Fransa 25 ilə yaxın müddətdə ona həvalə edilmiş vasitəçilik rolunu bəhanə gətirərək Ermənistanın təcavüzünə və işğalçı siyasətinə qiymət verməyib, münaqişənin həllinə çalışmayıb. Azərbaycanın işğala son qoyaraq münaqişəni təkbaşına həll etməsindən sonra ölkəmizə qarşı açıq şəkildə qarayaxma kampaniyası aparması və ittihamlar səsləndirməsi Fransanın qərəzli niyyətinin təzahürüdür”.
