“Xalqın ixtiyarına buraxılan yalnız bir sahə var”
Müsavat Partiyasının başqanı Arif Hacılı ata yurdu Zaqataladan yazıb. Siyasətçi qeyd edir ki, rayonda yeni, böyük fındıq zavodu tikildikdən sonra bu sahə monopoliyaya götürülüb: “Əvvəllər əhali əksər problemini fındıq, meyvə mövsümündə həll edirdi, indi bu imkan da əllərindən alınıb. Fındığın qiyməti endirilib, kiloqramı 1 manat 50 qəpiklə 1 manat 70 qəpik arası dəyişir.
Əhali acınacaqlı vəziyyətdədir. Fındığın qiyməti yox, meyvələr ağaclarda çürüyür. Yerli hakimiyyət strukturları isə bütün gəlirli sahələrin üzərinə əl qoyan mərkəzi hakimiyyətin himayəsi altında obyekt altı əraziləri qarış-qarış satmaq, regionların inkişafı üçün ayrılan vəsaiti bölüşdürüb mənimsəməklə məşğuldur.
Belə görünür ki, ölkədə monopoliyaya alınmadan xalqın ixtiyarına buraxılan yalnız bir sahə var: vətəni qorumaq, vətən yolunda şəhid, qazi olmaq”.
Novator.az bildirir ki, 1962-ci il yanvarın 22-də Zaqatalanın Yuxarı Tala kəndində doğulan Arif Hacılı Bakı Dövlət Universitetinin jurnalistika fakültəsini bitirib, Zaqatala radiosunun əməkdaşı olub.
1988-ci ildə milli azadlıq hərəkatına qoşulan Arif Hacılı 1991-1992-ci illərdə Azərbaycan Xalq Cəbhəsinin Ali Məclisinə sədrlik edib.
1990-cı ildə parlamentin deputatı seçilib, Əbülfəz Elçibəyin prezidentliyi dövründə (1992-1993) ərazi hakimiyyət və idarəetmə orqanları ilə iş üzrə dövlət müşaviri postunu tutub.
1992-ci ildən Müsavatın katibi, 2001-ci ildən partiya başqanının müavini olub.
2003-2005 və 2011-2012-ci illərdə həbsdə yatıb.
2014 və 2019-cu illərdə başqan seçilib.
