Həm gerilik, həm geriləmə proqnozu
İqtisadçı alim, ADR Partiyasının sədri Qubad İbadoğlu iqtisadi artım göstəricilərinə nəzər salaraq Azərbaycanın Cənubi Qafqazda autsayder olduğunu vurğulayır: “Ermənistan iqtisadi artım tempinə görə Avropada birinci, Gürcüstan ikincidir. Proqnozlara əsasən, qonşu ölkələrin iqtisadiyyatı getdikcə böyüyəcək, Azərbaycan iqtisadiyyatı kiçiləcək. 2022-ci ilin yanvar-sentyabr aylarında Azərbaycanda ümumi daxili məhsul (ÜDM) ötən ilin eyni dövrünə nəzərən 5,6 faiz artıb. Gürcüstanda artım 10,2 faiz, Ermənistanda 11,4 faiz göstərilib.
Qonşu ölkələrdə 2022-ci ilin sonuna və sonrakı illərdə iqtisadi artım sürətlənəcəyi halda Azərbaycanda yavaşıyacaq. Beynəlxalq Valyuta Fondu 2022-ci ildə Azərbaycanda ÜDM-in 3,7 faiz artacağı proqnozu verir. 2023-2027-ci illər üzrə artım proqnozu 2,5 faizdir.
Ermənistanda bu ilin sonuna 12,9 faiz, gələn il üçün 7 faiz, yaxın bir neçə ildə 9 faizədək artım gözlənir, Gürcüstanda 2025-2027-ci illərdə 5,2 faiz iqtisadi artımın qeydə alınması mümkündür”.
Novator.az-ın məlumatına görə, Qubad İbadoğlu qeyd edir ki, Ermənistanda və Gürcüstanda artımın başlıca hərəkətverici qüvvəsi gənc və ixtisaslı rusların hər iki ölkəyə kütləvi axınıdır: “Bu il onların hesabına Ermənistanın informasiya texnologiyaları sektorunda insan kapitalının 25 faiz artımı gözlənir. İstedadlı, savadlı insanlar Ermənistana və Gürcüstana köçür, bu da inkişafa stimul verir. Azərbaycandan isə beyin axını dayanmır, ixtisaslı kadrlar ölkəni tərk edirlər”.
