Müəllim günündə
Azərbaycan Demokratiya və Rifah Partiyasının sədri Qubad İbadoğlu oktyabrın 5-də qeyd olunan Beynəlxalq Müəllimlər Günündə status paylaşıb: “Müəllim ailəsində böyümüşəm. Anam 45 il dil-ədəbiyyat müəllimi, atam vəfat edənə qədər 20 il kimya-biologiya müəllimi olub. Özüm 1996-cı ildən pedaqoji fəaliyyətlə məşğulam: 21 il Azərbaycan Dövlət İqtisad Universitetində, 3 il Ratqers Universitetində (ABŞ) dərs demişəm, 2-ci ildir London İqtisad və Siyasi Elmlər Məktəbində çalışıram. Azərbaycanın inkişafı və gələcəyi üçün təhsildən önəmli məsələ görmürəm.
Müəllimlər bizə ülvi dəyərləri öyrətmiş insanlardır. Təəssüf ki, ölkədəki seçkilər zamanı ən çox müəllimlər zərbə alır. Seçkilərin məktəblərdə təşkili, təhsil işçilərinin iştirakı ilə saxtalaşdırılması müəllimlərin nüfuzunu ciddi zədələyib. Seçki idarəçiliyinə cəlb edilən müəllimlər seçkidən seçkiyə daha çox ictimai qınağa tuş gəliblər. Çünki bəziləri seçkilərdə saxtakarlıq edib, peşə dəyərlərinə xilaf çıxıb, çirkaba bulaşıb, vətəndaşların haqqını siyasi hakimiyyətin sifarişi ilə pozublar.
Cəmiyyət bu barədə ciddi düşünməli və mövqe qoymalıdır. Müəllimlərə etimadın azalması təhsildə islahatların həyata keçirilməsində ciddi əngələ çevrilir. Getdikcə nüfuzunu itirən müəllimlərə görə bütövlükdə cəmiyyət inkişafdan qalır.
Zorla, güclə başqasını əzmək məktəbdə də, ailədə də, bütövlükdə cəmiyyətdə də inkişaf edir. Ona görə də valideynlərin və müəllimlərin üzərinə böyük məsuliyyət düşür. Gənc nəslin tərbiyəsində müəllimlərin hüquqları və səlahiyyətləri genişləndirilməli, onların dərs yükü 18 saatdan 12 saatadək endirilməklə iş qrafiki optimallaşdırılmalı, əmək haqları artırılmaqla iqtisadi müstəqilliyi təmin edilməlidir. Neft pullarını daşa-çınqıla, quma xərcləməkdənsə müəllimlərin maaşlarını artırmaq, təhsil işçilərinə və təhsil alanlara tədris yönlü texnoloji məhsulları hədiyyə etmək həm insanın inkişafı, həm də təhsil işçilərinin sosial-iqtisadi tərəqqinin müasir nəticələrinə çıxışı baxımından ölkəyə daha çox fayda verərdi”.
