Sabiq baş nazir qayıdır?
Bolqarıstanda oktyabrın 2-də keçirilmiş növbədənkənar parlament seçkisinin ilkin nəticələri açıqlanıb. Novator.az-ın məlumatına görə, GERB Partiyası ilə müttəfiqi Demokratik Qüvvələr İttifaqı 25,4 faiz səslə öndə göstərilir.
GERB Partiyasına 1959-cu il təvəllüdlü Boyko Borisov liderlik edir. O, 2009-2013, 2014-2017 və 2017-2021-ci illərdə baş nazir postunu tutub.
Yeniliklərə Davam Partiyasının qanunverici orqana 20,2 faiz, Hüquq və Azadlıq Hərəkatının 13,5 faiz, Dirçəliş Partiyasının 10,1 faiz, Sosialist Partiyasının 9,3 faiz, Demokratik Bolqarıstan Partiyasının 7,4 faiz, Bolqar Üsyanı Partiyasının 4,6 faiz səslə düşdüyü vurğulanır.
Proporsional üsulla (partiya siyahıları üzrə) seçilən Bolqarıstan parlamenti 240 deputatdan ibarətdir. 2021-ci il aprelin 4-də və iyulun 11-də keçirilmiş parlament seçkilərindən sonra hökumət qurmaq mümkün olmayıb. 14 noyabr 2021-ci il seçkisindən sonra qurulan hökumət 2022-ci il iyunun 22-də istefaya göndərilib. İyulun 28-də heç bir siyasi qüvvənin hökumət qura bilmədiyi bəyan olunub, növbədənkənar seçkiyə qərar verilib.
