2021-ci ildən ABŞ prezidenti olan Cozef Baydenin administrasiyasında 15 nazir (katib) var: Entoni Blinken – dövlət katibi (xarici işlər naziri), Lloyd Ostin – müdafiə naziri, Merrik Qarland – ədliyyə naziri (baş prokuror), Deb Holann – daxili işlər naziri, Alexandro Mayorkas – daxili təhlükəsizlik naziri, Canet Yellen – maliyyə naziri, Cina Raymondo – ticarət naziri, Pit Butticiç – nəqliyyat naziri, Cennifer Qrenholm – energetika naziri, Tom Vilsek – kənd təsərrüfatı naziri, Marşa Fac – tikinti və şəhər inkişafı naziri, Marti Uolş – əmək naziri, Xavyer Beserra – səhiyyə və sosial xidmətlər naziri, Denis Makdonou – veteranlarla iş naziri, Miqel Kardona – təhsil naziri.

Novator.az bildirir ki, nazirlərin və administrasiyanın başqa üzvlərinin təyinatını Konqresin yuxarı palatası olan Senat təsdiqləyir.

Milli Kəşfiyyata Evril Heyns direktorluq edir.

Şalanda Yunq İnzibati-Büdcə İdarəsinin direktoru, Ketrin Tay ticarət nümayəndəsi, İzabel Qusman Kiçik Biznes Administrasiyasının rəhbəri, Sesiliya Rouz İqtisadi Məşvərətçilər Şurasının sədri, Maykl Stenli Riqan Ətraf Mühitin Mühafizəsi Agentliyinin rəisi, Linda Tomas-Qrinfild ABŞ-ın BMT-dəki daimi nümayəndəsidir.

Alondra Nelson Elm və Texnologiya Siyasəti Ofisinin direktoru səlahiyyətlərini icra edir.

Seçkili vitse-prezident postunu Kamala Harris tutur.

Ağ ev administrasiyasının başçısı vəzifəsi Ron Kleynə həvalə olunub. Bu təyinat üçün Senatın təsdiqi gərək deyil.

1942-ci il təvəllüdlü Cozef Bayden 2020-ci il noyabrın 3-də keçirilmiş ümumxalq səsverməsində Cozef Bayden 538 nəfərlik Seçicilər Kollegiyasına 306 nümayəndə qazanıb. Seçicilər Kollegiyasındakı 14 dekabr 2020-ci il səsverməsi də eyni nəticə ilə yekunlaşıb. 2021-ci il yanvarın 7-də Senatın və Konqresin alt qanadı olan Nümayəndələr Palatasının birgə iclasında Seçicilər Kollegiyasındakı səsvermənin nəticəsi – Cozef Baydenin prezident seçilməsi təsdiqlənib. Yanvarın 20-də Cozef Bayden and içərək prezident səlahiyyətlərinin icrasına başlayıb.