Ən böyük günah
Arif Hacılı
Müsavat Partiyasının başqanı
Azərbaycanda hər ticarət sahəsinin monopolisti var. Kimsə gömrükdən satış üçün mal keçirəndə, malı əlindən alınacaq qədər fağır deyilsə, sahə üzrə monopolistin yanına çağırılır, qiymət danışılır, qoyulan qiymətlə bağlı sual verilsə, həmin qiymət bir qədər də düşür.
Azərbaycan sərhədindən, gömrükdən, Sərhəd Xidmətindən xəbərsiz bir quş uça bilməz. Bir telefon, bir kompüter, bir blok siqaret, bir-neçə yüz qram ətir gətirənin nəfəsini kəsərlər.
Bu, Azərbaycanda bizneslə məşğul olan hər kəsə bəlli həqiqətdir.
Amma ən bahalı, ən gəlirli narkotik biznesinin monopolistləri məlum deyil? Gömrük sistemi, Sərhəd Qoşunları, ölkənin inzibati orqanları bu sahənin monopolistlərini və onların xırda kuryerlərini tanımır? Yoxsa bütün sahələr monopoliyada olduğu halda yalnız narkotik ticarətinə azad bazar sistemi tətbiq olunub?
İndiki hakimiyyətin Azərbaycan xalqı qarşısında günahı çoxdur. Bunlardan bəlkə də ən böyüyü narkomaniyanın qarşısını almaması, qazanc məqsədilə gənclərimizi və deməli, gələcəyimizi məhv edən bu bəlanın inkişafına şərait yaratmasıdır…
