Qərbi Azərbaycan İcmasının ünvanı
Qərbi Azərbaycan İcmasının mərkəzi qərargahı Bakının Nərimanov rayonunda, Gülarə Qədirbəyova, 9-da, Şuşa Rayon İcra Hakimiyyəti və “Qarabağa dönüş” İctimai Birliyinin qərar tutduğu ünvanda yerləşəcək. Bina hazırda icmaya təhvil verilir.
Novator.az bildirir ki, Qərbi Azərbaycan İcması avqustun 3-də Azərbaycan Qaçqınlar Cəmiyyətinin bazasında yaradılıb. İctimai quruma Milli Məclisin deputatı Əziz Ələkbərli rəhbərlik edir. 1960-cı ildə Ermənistanda, indiki Ararat rayonunun Qaralar kəndində doğulan Əziz Ələkbərli filologiya elmləri namizədi, hakim Yeni Azərbaycan Partiyasının üzvüdür.
“Qarabağa dönüş” İctimai Birliyi 2021-ci il aprelin 30-da “Dağlıq Qarabağ bölgəsinin azərbaycanlı icması” İctimai Birliyinin bazasında qurulub. Təşkilata Milli Məclisin deputatı Tural Gəncəliyev rəhbərlik edir.
Şuşa Rayon İcra Hakimiyyəti 1991-ci ilin payızında yaradılıb, 1992-ci ilin mayındakı işğaldan sonra Bakıda qərar tutub, hazırda da paytaxtda fəaliyyət göstərir.
2009-cu il fevralın 27-dən Şuşa Rayon İcra Hakimiyyətinə Bayram Səfərov başçılıq edir.
2020-ci il noyabrın 8-də Şuşa şəhəri işğaldan qurtulub.
Şuşa rayonu Şuşa şəhəri ilə yanaşı 1 qəsəbə və 37 kənddən ibarətdir. Hazırda Şuşanın Daşaltı kəndi də Azərbaycanın nəzarətindədir. Ərazilərdə idarəçiliyə prezidentin Şuşa rayonunda xüsusi nümayəndəliyi və Şuşa Şəhəri Dövlət Qoruğu İdarəsi məsuldur.
