Şuşaya getmisən? (Sorğunun nəticələri)
Vətəndaş cəmiyyəti eksperti Samir Əliyev sosial şəbəkələrdəki hesablarında Şuşa şəhərinə səfər mövzulu sorğu keçirib. Novator.az-ın məlumatına görə, ekspert yazır ki, iyulun son iki günündə aparılmış sorğuya 320 nəfər qatılıb.
Əsası 1750-ci ildə qoyulan Şuşa şəhəri 1992-ci il mayın 9-dan 2020-ci il noyabrın 8-dək erməni işğalında olub.
Samir Əliyev qeyd edir ki, respondentlərin 80%-i işğaldan azad olunduqdan sonra Şuşaya səfər etmədiyini yazıb:
– Sorğu iştirakçılarının 15%-i Şuşaya bir dəfə, 3%-i iki dəfə, 2%-i üç dəfə getdiyini bildirib.
1 respondent Şuşaya dörd dəfə, 2 respondent beş dəfədən çox səfər etdiyini açıqlayıb.
Şuşaya səfər etməyənlərin 24%-i avtobus reyslərinə (Bakıdan və Füzulinin Əhmədbəyli kəndindən) bilet almaq cəhdlərinin uğursuz olduğunu, 9%-i dövlət qurumlarından səfər təklifi gözlədiyini qeyd edib.
Respondentlərin 14%-i Şuşaya daha sonra getməyi planlaşdırdığını bildirib, 20%-i səfərə vaxtının olmadığını qeyd edib.
Şuşaya getməyən respondentlərin 33%-i bunu sərbəst, müstəqil səfər imkanlarının yoxluğu; marağının olmaması; koronavirus infeksiyasına qarşı tam vaksinasiyadan keçməməsi; xaricdə yaşamağı, icazə ala biləcəyinə inanmaması və başqa səbəblərlə əsaslandırıb.
