2 nömrəli doğum evi yenilənib
İyulun 29-da prezident İlham Əliyev və birinci vitse-prezident Mehriban Əliyeva Bakının Bakıxanov qəsəbəsindəki 2 nömrəli doğum evində aparılmış əsaslı təmirdən sonra yaradılan şəraitlə tanış olublar.
AZƏRTAC bildirir ki, 2 nömrəli doğum evi 1987-ci ildə istifadəyə verilib. 2019-cu ildə doğum evinin əsaslı təmiri üçün 2 milyon manat vəsait ayrılıb. Əsaslı şəkildə təmir edilən 120 çarpayılıq səhiyyə müəssisəsində ən müasir tələblərə uyğun tibbi avadanlıqlar quraşdırılıb. Üçmərtəbəli binada ümumilikdə 51 palata var. Tibb ocağında 80 çarpayılıq doğum, 30 çarpayılıq ginekologiya və 10 çarpayılıq reanimasiya şöbələri fəaliyyət göstərir. Burada vətəndaşlara həm ambulator, həm də stasionar xidmət göstəriləcək.
