Senatorlar sosial şəbəkələri rus dezinformasiyasını boğmağa çağırır
Amerikalı senatorlar dünyanın nüfuzlu sosial şəbəkə platformalarını Rusiyanın Ukrayna müharibəsi barədə ispandilli məkanda yaydığı dezinformasiyalara qarşı daha effektli mübarizə aparmağa çağırırlar.
Novator.az saytı “Reuters” agentliyinə istinadla xəbər verir ki, bu məqsədlə senatorlar birgə müraciət qəbul ediblər.
Müraciəti ABŞ Senatının Beynəlxalq Münasibətlər Komitəsinin sədri Bob Menendes, senatorlar Tim Keyn və Bill Kessidi imzalayıblar.
Müraciət “Facebook”, “Twitter” və “Telegram” platformalarının rəhbərlərinə ünvanlanıb.
Müraciətdə Rusiyanın RT kanalının və “Sputnik” agentliyinin ispan dilindəki versiyalarına, yəni “RT en Espanol” kanalına və “Sputnik Mundo” saytına xüsusi diqqət yönəltmək, burada işıq üzü görən dezinformasiyaların sosial şəbəkələrə ayaq açmasına imkan verməmək xahiş olunur.
Bildirilir ki, Rusiyanın dövlət mediasının ispan dilində apardığı dezinformasiya kampaniyaları Latın Amerikasında, Karib hövzəsində olduğu kimi ABŞ-da da ispandilli icmalara təsir edir, Birləşmiş Ştatların milli maraqlarına toxunur.
“Reuters” xəbər verir ki, senatorların müraciəti artıq rəsmi şəkildə “Meta” şirkətinin (“Facebook” şəbəkəsi bu şirkətə tabedir) baş direktoru Mark Suxerberqə, “Twitter”in baş direktoru Paraq Aqravala və “Telegram”ın direktoru Pavel Durova çatdırılıb. Onların müraciətə reaksiyası hələ bəlli deyil.
Mənbə: Reuters.com
