Ərzaqlıq buğdaya subsidiya: fərman imzalandı
Prezident İlham Əliyev iyulun 19-da ərzaqlıq buğda ilə bağlı yeni tədbirlərə fərman verib. Fərmana görə, Kənd Təsərrüfatı Nazirliyi ilə bağlanmış müqavilə əsasında ərzaqlıq buğda istehsalı öhdəliyi götürmüş şəxslərin istehsal etdiyi və Dövlət Ehtiyatları Agentliyinə, un dəyirmanlarına təhvil verilən ərzaqlıq buğdaya 2023-cü ildən başlayaraq 5 il müddətində məhsul subsidiyası tətbiq edilir.
Nazirlər Kabineti üç ay müddətində taxıl haqqında qanunvericiliyin təkmilləşdirilməsi, o cümlədən ərzaqlıq buğdanın dövlət tədarükü ilə bağlı təkliflərini; ərzaqlıq buğda istehsalçılarına müasir təsərrüfatların yaradılması və müasir suvarma sistemlərinin alınması üçün güzəştli şərtlərlə verilən kredit mexanizminin təkmilləşdirilməsi və dövlət zəmanətinin tətbiqi ilə bağlı təkliflərini təqdim etməli; 2022-ci il avqustun 1-dək, növbəti illərdə isə hər il iyulun 1-dək ərzaqlıq buğdanın dövlət tədarük qiymətini müəyyən etməlidir.
Kənd Təsərrüfatı Nazirliyinə ərzaqlıq buğdaya məhsul subsidiyasının tətbiq edilməsi üçün tədbirlər görmək tapşırılıb.
