Piketə niyə razılıq verilmədi?
Bakı Şəhər İcra Hakimiyyəti Nazirlər Kabinetinin binası qarşısına təyin olunmuş 20 iyul piketinə razılıq verməyib. Aksiyanın təşkilatçısı, siyasətçi Tofiq Yaqubluya verilən rəsmi cavabda piketin məqsədəuyğun olmadığı vurğulanıb.
Piketdə quru sərhədlərin açılması tələbi qoyulacağı bəyan olunmuşdu. 2020-ci ilin yazından Azərbaycanda yeni koronavirus infeksiyasına görə xüsusi karantin rejimi tətbiq olunur. Nazirlər Kabineti ölkəyə giriş-çıxışa məhdudiyyətə – quru sərhədlərin vətəndaşlar üçün qapalı olmasına qərar verib, sonuncu dəfə qadağanın müddətini 2022-ci il sentyabrın 1-dək uzadıb.
Tofiq Yaqublu öncə aksiyanı iyulun 13-nə təyin etmişdi. Bakı Şəhər İcra Hakimiyyəti aksiyaya razılıq verməmiş, piket barədə müraciətin qanunda nəzərdə tutulan vaxtdan (azı 5 iş günü əvvəl) gec göndərildiyini bildirmiş, Tofiq Yaqublu aksiyanı iyulun 20-nə keçirib bu barədə rəsmi müraciət etmişdi.
Novator.az bildirir ki, 1961-ci il təvəllüdlü Tofiq Yaqublu milli azadlıq hərəkatının (1988-1991) fəalı, Birinci Qarabağ müharibəsinin veteranıdır. Əbülfəz Elçibəyin prezidentliyi dövründə (1992-1993) Binəqədi Rayon İcra Hakimiyyəti başçısının birinci müavini vəzifəsində çalışıb. Müsavat Partiyasının və Demokratik Qüvvələrin Milli Şurasının üzvüdür.
