Konstitusiya Məhkəməsindən inzibati xəta şərhi
Konstitusiya Məhkəməsinin Plenumu Şirvan Apellyasiya Məhkəməsinin müraciətinə əsaslanaraq İnzibati Xətalar Məcəlləsinin 333.2-ci maddəsini şərh edib.
Novator.az bildirir ki, İnzibati Xətalar Məcəlləsinin 333.1-ci maddəsi nəqliyyat vasitəsini idarə etmək hüququ olan şəxsin nəqliyyat vasitəsini sərxoş vəziyyətdə idarə etməsinə görə dörd yüz manat məbləğində cərimə və ya nəqliyyat vasitəsini idarə etmək hüququnun altı aydan bir ilədək müddətə məhdudlaşdırılmasını nəzərdə tutur. 333.2-ci maddəyə əsasən, 333.1-ci maddədəki xətanı inzibati tənbeh almış şəxsin inzibati tənbeh vermə haqqında qərarın qüvvəyə mindiyi gündən bir il ərzində təkrar törətməsinə nəqliyyat vasitələrini idarə etmək hüququ iki il müddətinə məhdudlaşdırılmaqla dörd yüz manatdan beş yüz manatadək məbləğdə cərimə və ya nəqliyyat vasitəsini idarə etmək hüququ iki il müddətinə məhdudlaşdırılmaqla on beş günədək inzibati həbs düşür.
Konstitusiya Məhkəməsinin qərarına görə, inzibati tənbeh vermə haqqında qərarın qanuni qüvvəyə minməsindən sonra bir il ərzində eyni xətanın təkrar törədilməsi şəxsin məsuliyyətinin ağırlaşması və onun barəsində daha sərt tənbeh tədbirinin tətbiqi üçün əsasdır: “İnzibati cəriməni qərar qanuni qüvvəyə minənədək ödəmiş və həmin qərarı qanunvericiliklə müəyyən edilmiş qaydada mübahisələndirməmiş şəxslərin inzibati məsuliyyətə cəlb edilməmiş hesab olunduqları müddətin başlanğıcı tənbehin icrasının bitdiyi gündən hesablanmalıdır”.
İnzibati Xətalar Məcəlləsinə əsasən, barəsində inzibati tənbeh tətbiq olunmuş şəxs tənbehin icrasını bitirdiyi gündən etibarən bir il ərzində yeni inzibati xəta törətməmişdirsə, o, inzibati məsuliyyətə cəlb edilməmiş hesab olunur.
