Boris Conson Böyük Britaniyanın baş naziri vəzifəsindən istefa verməyə razılaşıb. Xəbəri iyulun 7-də “The Guardian” qəzeti yayıb.

Boris Consonun istefa vermək qərarına gəldiyi, amma oktyabr ayında hakim Mühafizəkarlar Partiyasına yeni lider seçilənə qədər səlahiyyətlərinin icrasını davam etdirəcəyi bildirilir.

1964-cü il təvəllüdlü Boris Conson 2019-cu il iyulun 23-də Mühafizəkarlar Partiyasının lideri seçilib, iyulun 24-də baş nazirliyə başlayıb. 2019-cu il dekabrın 12-də keçirilmiş parlament seçkisini udan Mühafizəkarlar Partiyası yenidən hökumət qurub. Mühafizəkarlar Partiyası parlamentin alt qanadı olan 650 yerlik İcmalar Palatasında 358 mandatla təmsil olunur.

Baş nazir xeyli vaxtdır 2020-2021-ci illərin koronavirus qapanmaları, sərt karantin rejimləri dövründə hökumət iqamətgahında keçirilən kütləvi şənlik mərasimlərinə qatılmaqda ittiham olunur.

2022-ci il iyulun 5-dən başlayaraq isə hökumətin 50 üzvü, o cümlədən xeyli nazir istefa verib. Onlar addımlarını baş nazirə etimadsızlıqla əsaslandırıb, Boris Consonu postunu tərk etməyə çağırıb.

Baş nazir əvvəllər adı müxtəlif qalmaqallarda hallanmış Kris Pinçerə hakim partiyada yüksək vəzifə verməkdə təqsirli bilinir. Parlamentin üzvü olan Kris Pinçer iyunun 29-da paytaxt Londonun klublarının birində sərxoş vəziyyətdə dava salıb, ertəsi gün günahını boynuna alaraq istefa verib, bununla da hökumətdə və ümumən ölkədə siyasi zəlzələ yaranıb.

Boris Conson ABŞ-ın Nyu-York şəhərində anadan olub. Böyük Britaniyanın Oksford Universitetinin məzunudur. Uzun illər jurnalist fəaliyyəti ilə məşğul olub. Böyük Britaniya parlamentinin İcmalar Palatasına ilk dəfə 2001-ci ildə seçilib. 2008-2016-cı illərdə Londonun meri, 2016-2018-ci illərdə Böyük Britaniyanın xarici işlər naziri olub.

Mənbə: Theguardian.com