Ləng metro
İqtisadçı, ADR Partiyasının sədri Qubad İbadoğlu Bakı metrosunun ləng böyüməsinə diqqət çəkib. Novator.az-ın məlumatına görə, o qeyd edir ki, 2016-cı ildə “Avtovağzal” stansiyası istifadəyə veriləndən 6 il sonra – 2021-ci ildə hələlik son stansiya olan “8 Noyabr” açılıb: “Bunlardan əvvəl – 2008-ci ildə “Nəsimi”, 2009-cu ildə “Azadlıq prospekti”, 2011-ci ildə “Dərnəgül” stansiyası sərnişindaşıma prosesinə qoşulub. Hazırda metropoliten xətlərinin sayı 3, xətlərin ümumi uzunluğu 36,6 kilometr, stansiyalarının sayı 26-dır.
Bakı nədən metrosuz inkişaf edir, niyə aeroport və ya Qaradağ rayonu istiqamətində böyümür? Rəsmi plana görə, paytaxtın yeraltı yollarının ümumi uzunluğu 119,1 kilometrə, metro stansiyalarının sayı 76-ya çatacaq. Nə vaxt?
İndiki hakimiyyətin dövründə ölkə 200 milyard dollara qədər neft-qaz gəliri əldə edib. Bu vəsaitin 1 faizi hesabına paytaxtın metro nəqliyyatını inkişaf etdirmək, sərnişinləri ekoloji cəhətdən təmiz nəqliyyat vasitəsi ilə daşımaq mümkün idi. Bu, şəhərdəki tıxac probleminin həllində də əhəmiyyətli rol oynaya bilərdi”.
Bakıda metro nəqliyyatı 1967-ci ildən fəaliyyət göstərir.
