Bağlı qapı mənzərəsi
İqtisadçı, REAL Partiyasının funksioneri Natiq Cəfərli yol yoldaşı olduğu vətəndaşın gileyini paylaşıb. Novator.az-ın məlumatına görə, o yazır ki, iyulun 3-ü gecə təyyarə ilə Gürcüstanın paytaxtından Bakıya dönərkən şəmkirli bir sərnişinlə söhbətləşib: “Gecə ikinin yarısı aeroportdan çıxıb Şəmkirə getməli idi. Dedi Tiflisdən kəndlərinə 2 saatlıq yoldur: “2 saat Tiflis aeroportunda gözləmişəm, 1 saat uçmuşam, indi də yarım saat yoxlama. Maşınım aeroportun dayanacağındadır, gecə 4-5 saat yol sürməliyəm. İkicə saata Tiflisdən kəndə gələcəyim yola 8-9 saatım gedəcək.
Biletə 298 manat xərcim çıxıb. Şəmkirdən Bakıya, Bakıdan da ora 120 manatlıq benzin yanır. Yolda bir tikə çörək yesəm, 15 manat da bu eləyir. Tiflisə gedib-gəlməyim 16-18 saata, 400-450 manat başa gələcək. Sərhəd açıq olsaydı, 30 manat benzinlə gedib-gələr, səhər çıxıb, axşam evdə olardım”.
Adam bilmir belə vətəndaşlara nə desin, necə izah etsin bütün bu mənzərəni”.
2020-ci ilin yazından Azərbaycanda yeni koronavirus infeksiyasına görə xüsusi karantin rejimi tətbiq olunur. Nazirlər Kabineti ölkəyə giriş-çıxışa məhdudiyyətə – quru sərhədlərin vətəndaşlar üçün qapalı olmasına qərar verib, sonuncu dəfə qadağanın müddətini 2022-ci il sentyabrın 1-dək uzadıb.
