Əli Kərimli
AXCP sədri

İlham Əliyev deyəndə xarici ölkələr bizdən öyrənir, dünyaya yol göstəririk, gülürdük. Ancaq öyrənənlər varmış.

Türkmənistanda prezident Qurbanqulu Berdiməhəmmədov Əliyevlərin Azərbaycanda yaratdığı nümunədən istifadə edib hakimiyyəti “uğurla” öz oğluna ötürdü.

Tacikistan prezidenti İmaməli Rəhman da Azərbaycan nümunəsini öz ölkəsində tətbiq etməyə – hakimiyyəti oğluna verməyə hazırlaşır.

Özbəkistan prezidenti Şövkət Mirziyayev İlham Əliyevin yaratdığı nümunədən ruhlanaraq referendum keçirib prezidentin səlahiyyət müddətini 5 ildən 7 ilə qaldırmağa, istədiyi qədər prezident seçilmək üçün konstitusiyanın yaratdığı maneələri aradan qaldırmağa hazırlaşır.

Tək bunlar deyil. Avtoritar rejimli bəzi Afrika, Orta Şərq ölkələrində də Azərbaycan nümunəsi öyrənilir.

104 il öncə olduğu kimi bu gün də Azərbaycan Şərq, müsəlman dünyası üçün nümunədir, Azərbaycan təcrübəsi öyrənilir. Yalnız bir mühüm fərqlə. 104 il öncə Azərbaycan dünyəvi dövlət, cümhuriyyət qurmağın, haqqa və hüquqa dəyər verməyin, azadlıqların təmin edilməsinin, qadınlara da kişilərlə bərabər hüquq verməyin nümunəsini yaradırdı. İndi Azərbaycan repressiyalarla xalqı “islah” etməyin, uzunmüddətli ailə hakimiyyəti qurmağın nümunəsini yaradır. Görün haradan haraya gəlmişik. Rəsulzadə yurdunun avtoritar rejimlər üçün nümunəyə çevrilməsinə görə xalq olaraq hamılıqla utanmağa başlayanda azadlıqlarımız uğrunda hərəkatımızın ikinci nəfəsi açılacaq.