Maaş dolanbacı
İqtisadçı Rövşən Ağayev Dövlət Vergi Xidməti ilə Medianın İnkişafı Agentliyinin jurnalistlər üçün təlimində səslənmiş bir rəqəmə diqqət çəkib – işə başlayanların 40 faizi minimum əməkhaqqı ilə çalışır: “Əlavə edilib ki, reallıqda maaş daha yüksəkdir, amma sahibkarlar bütün məbləği rəsmiləşdirmir. Bu iddia ilə bağlı iki məqamı qeyd etmək yerinə düşür. Əgər sahibkarlar hələ də maaşı ağartmağa maraqlı deyilsə, o zaman özəl sektorda çalışanların əməkhaqqını vergidən azad eləməyin nə əhəmiyyəti oldu? 2019-cu il yanvarın 1-dən qeyri neft-qaz və qeyri-dövlət sektorunda çalışan şəxslərin əməkhaqqının 8000 manatadək hissəsi 7 il müddətinə gəlir vergisindən azad edilib.
Yox, işə başlayanların 40 faizi gerçəkdən minimum əməkhaqqı ilə çalışırsa, o zaman belə çıxır ki, son 6-7 ildə minimum maaş və bu rəqəm ətrafında məvacib alanların sayı azalmaq əvəzinə daha sürətlə artıb. Halbuki elə rəsmi statistikanın özünün dediyinə görə, 2020-ci ildə 1500 manatdan çox maaş alanların sayı 2014-cü illə müqayisədə 3 dəfə artıb. Həmin dövrdə minimum maaş və ondan 25-30 faiz yüksək məbləğdə əməkhaqqı alanların xüsusi çəkisi isə təxminən 30 faizdən 40 faizə yaxınlaşıb.
Minimum əməkhaqqından söz düşmüşkən, bizim toplum çörəyə həssas olduğu üçün bir müqayisə aparaq: 2022-ci il yanvarın 1-dən 300 manat olan minimum maaşa əvvəlki minimum maaşa – 250 manata nisbətən 8 faiz daha az çörək düşür”.
