Neft ixracatçılarının OPEK+ koalisiyası (OPEK-dən Anqola, Birləşmiş Ərəb Əmirlikləri, Ekvatorial Qvineya, Əlcəzair, İraq, Konqo, Küveyt, Qabon, Nigeriya, Səudiyyə Ərəbistanı və qeyri-OPEK ölkələri (Azərbaycan, Bəhreyn, Bruney, Cənubi Sudan, Qazaxıstan, Malayziya, Meksika, Oman, Rusiya, Sudan) yeni hasilat razılaşması əldə edib. Novator.az bildirir ki, qərara görə, avqust ayında Azərbaycanın gündəlik xam neft hasilatı 717 min barreli ötməməlidir.
İyul üçün gündəlik hasilat norması 706 min barreldir.
Energetika Nazirliyi ölkənin gündəlik hasilatını yanvarda 580,9 min barrel, fevralda 566,3 min barrel, martda 579,4 min barrel, apreldə 579,1 min barrel, mayda 571,3 min barrel göstərib.
2022-ci ilin yenilənən dövlət büdcəsində bir barrel neftin qiyməti 85 dollardan götürülüb. “AzəriLayt” markalı Azərbaycan nefti yanvara 82,49, fevrala 94,20, marta 102,30, aprelə 112,33, maya 110,70, iyuna 127,48, iyula 123,40 dollarla başlayıb.
