İqtisadçı Rövşən Ağayev Azərbaycanda qiymətlərin artım tempinin yaşayış minimumu dəyərinin artım tempini üstələdiyini yazır: “Hətta rəsmi statistikanın elan elədiyi rəqəmlərə görə, koronavirus pandemiyasının başladığı 2020-ci ilin mart ayı ilə müqayisədə ən zəruri 60 ərzaq, qeyri-ərzaq və xidmət səbətinin dəyəri 25 faizdən çox bahalaşıb. Amma yoxsulluğu və sosial ödənişləri müəyyənləşdirmək üçün əsas normativ rolunda çıxış edən yaşayış minimumunun dəyərini hökumət son iki ildə cəmi 10 faiz artırıb. 2020-ci ildə ölkə üzrə yaşayış minimumu 190 manat idi, hazırda 210 manatdır.

Qiymətlərin artım tempi rəsmi yaşayış minimumunun dəyərinin artım tempini az qala üç dəfə üstələyir. İlin sonunda isə rəsmi statistika həmin yaşayış minimumu əsasında yenə 5 faizlik yoxsulluq rəqəmi açıqlayacaq”.

2022-ci il üçün yaşayış minimumu əmək qabiliyyətli əhali üçün 220 manat, pensiyaçılar ucun 176 manat, uşaqlar üçün 193 manat məbləğində təsdiqlənib.

Novator.az bildirir ki, yaşayış minimumu rəsmi minimum istehlak səbətinə əsaslanır. Səbətə ərzaq məhsulları, qeyri-ərzaq malları, xidmətlər daxildir.