Yol niyə bağlıdır?
2020-ci ilin yazından Azərbaycanda koronavirus infeksiyasını cilovlamaq üçün tətbiq olunan xüsusi karantin rejimi ölkəyə giriş-çıxışa məhdudiyyətlər qoyur – quru sərhədlər bağlıdır. Novator.az-ın məlumatına görə, AXCP sədri Əli Kərimli quru sərhədlərin bağlı saxlanmasının siyasi hakimiyyətin və onun ətrafındakı oliqarxların marağından irəli gəldiyini yazır: “Quru yolu bağlamaqla 100 minlərlə insan “Azərbaycan Hava Yolları”nın (AZAL) bahalı biletlərini almağa məcbur edilir. AZAL-ın xərcini dövlət çəkir, qazanc isə özlərinə gedir. 100 minlərlə vətəndaş itirir, məlum ünvan qazanır.
Quru sərhədləri bağlı saxlamaqla rejim sərhəd ticarətinin qarşısını alır. Milyonlarla sadə vətəndaş, kiçik və orta biznes sahibləri ölkəyə ərzaq məhsulları və digər malları gətirmək imkanından məhrum edilir. Beləliklə, hamı məcbur olur monopolist, korrupsioner oliqarxların ölkəyə gətirdiyi mal və məhsulları alsın, təbii ki, daha yuxarı qiymətə. Zərərə düşən sadə kasıb əhali, milyardlarını daha da artıran hakim ailə və ətrafındakı oliqarxlar olur.
Rejim ölkənin quru sərhədlərini bağlı saxlayır ki, Rusiyadakı böhran səbəbindən müflisləşmiş azərbaycanlılar ölkəyə asanlıqla qayıda bilməsin. Hakimiyyət həmin insanların ölkəyə qayıdıb işsizlər ordusunu daha da böyütməsindən, gələcəkdə gözlənən etirazlara qoşulmasından qorxur.
Beləliklə, rejim hər zaman olduğu kimi öz faydası üçün milyonlarla insana zülm edir. Onları bir heç sayır. Təəssüf ki, acı gerçəklik budur”.
2019-cu ilin dekabrında Çində üzə çıxıb dünyanı bürüyən yeni koronavirus infeksiyasına Azərbaycanda ilk yoluxma 2020-ci il fevralın 28-də qeydə alınıb. Rəsmi hesabata əsasən, ölkədə koronavirusa yoluxmuş 793010 nəfərin 9716-sı vəfat edib, 130-u aktiv xəstədir, qalanları sağalıb.
