Karantin uzanır, yenilənir
Nazirlər Kabineti yeni koronavirus infeksiyasına görə tətbiq olunan xüsusi karantin rejimini sentyabrın 1-dək uzadıb. Rejim iyulun 1-də başa çatmalı idi.
20 iyun qərarı həmçinin iyunun 21-dən ictimai yerlərdə şəxslərin 10 nəfərdən artıq qruplarda cəmləşməsinə yasağın, şənlik mərasimlərinin təşkili və keçirilməsi zamanı məlumatların İcaze.e-gov.az portalına daxil edilməsi, şənlik mərasiminin sahibi və şənlik mərasiminin keçirildiyi məkanın sahibi arasında müştərək məsuliyyət barədə imzalanan iltizamnamə tələbinin ləğvini nəzərdə tutur.
Ölkəyə giriş-çıxışa məhdudiyyət qalır – quru sərhədlər açılmır.
2019-cu ilin dekabrında Çində üzə çıxıb dünyanı bürüyən infeksiyaya Azərbaycanda ilk yoluxma 2020-ci il fevralın 28-də qeydə alınıb. Son hesabata əsasən, 793015 nəfər koronavirusa yoluxub, onların 9716-sı vəfat edib, 134-ü aktiv xəstədir, qalanları müalicə olunaraq sağalıb.
Xüsusi karantin rejimi 2020-ci il martın 31-dən hökm sürür.
