Azərbaycan komandalarının rəqibləri
UEFA Konfrans Liqasının 2022-2023 mövsümünə Azərbaycan “Neftçi”, “Zirə” və “Qəbələ” komandaları ilə çıxır. Birinci mərhələ 7-14 iyula, ikinci mərhələ 21-28 iyula, üçüncü mərhələ 4-11 avqusta, dördüncü mərhələ 18-25 avqusta, qrup mərhələsi 8 sentyabr-3 noyabra təyin olunub.
Novator.az bildirir ki, Azərbaycan komandaları turnirə ikinci mərhələdə qoşulur. İyunun 15-də atılan püşkdə “Neftçi”yə Kiprdən “Aris”, “Zirə”yə İsraildən “Makkabi” (Tel-Əviv), “Qəbələ”yə Macarıstandan “Fehervar” düşüb.
Üçüncü mərhələnin potensial rəqibləri siyahısında “Zarya” (Ukrayna), “Anderlext” (Belçika), “Volfsberq” (Avstriya), “Jil Visente” (Portuqaliya), “Tvente” (Niderland), dördüncü mərhələnin mümkün rəqibləri siyahısında “Fiorentina” (İtaliya), “Vilyarreal” (İspaniya), “Vest Hem” (İngiltərə) komandaları yer alır.
Çempionlar Liqasında ilkin təsnifat mərhələsi 21-24 iyuna təyin edilib.
Birinci mərhələdə (5-13 iyul) start götürən Azərbaycan təmsilçisi “Qarabağ”a Polşanın “Lex” komandası qismət olub.
İlkin, birinci mərhələlərdə ələnən komandalar Konfrans Liqasına, ikinci, üçüncü, dördüncü mərhələlərdə ələnən, qruplarda üçüncü yeri tutan komandalar Avropa Liqasına köç edəcək.
Birinci mərhələdə uduzacağı halda “Qarabağ” Konfrans Liqasına keçərək ya Slovakiyadan “Slovan”, ya da Gürcüstandan “Dinamo” (Batumi) ilə üz-üzə gələcək.
İkinci mərhələyə (19-27 iyul) keçəcəyi halda “Qarabağ” İsveçrənin “Sürix” komandasına rəqib olacaq.
Üçüncü mərhələnin (2-9 avqust) mümkün rəqibləri içində “Apollon” (Kipr), dördüncü mərhələnin (16-24 avqust) mümkün rəqibləri içində “Kopenhagen” (Danimarka) var.
Turnirin qrup mərhələsi sentyabrın 6-da başlayıb noyabrın 2-də bitəcək.
