“Dünya dəyişir. Azərbaycan da dəyişəcək”
AXCP sədri Əli Kərimli Qazaxıstandakı konstitusiya islahatlarına münasibət bildirib.
İyunun 5-i Qazaxıstanda konstitusiyaya əlavə və dəyişikliklər referendumu keçirilib. Rəsmi hesabata görə, səsverməyə qatılan şəxslərin 77 faizindən çoxu ana qanun yeniliklərini dəstəkləyib.
Əli Kərimli qeyd edir ki, konstitusiya islahatı rəsmiləşəndə prezidentin yaxın qohumları heç bir dövlət vəzifəsi tuta bilməyəcək, dövlət başçısının səlahiyyətləri azalacaq, əvəzində güclü, səlahiyyətli parlament formalaşacaq: “Dövlət çoxpartiyalılıq üçün şəraiti yaxşılaşdıracaq. Parlamentdə təmsil olunmaq üçün baryer 5 faizə endiriləcək. Partiyaların qeydiyyatı asanlaşdırılacaq, onların seçkidə iştirakı üçün tələb olunan seçici imzaları 20 mindən 5 minə düşəcək.
Prezident partiya üzvü olmayacaq və iki dəfədən artıq seçilməyəcək. Qazaxıstan “ümummilli lider”dən də imtina edir, ilk prezident Nursultan Nazarbayevin Elbaşı statusu konstitusiyadan çıxarılır.
Prezident Tokayevin təşəbbüsü ilə Qazaxıstan Konstitusiyasına xeyli mütərəqqi müddəalar əlavə edilib. Qalır onların həqiqətən də həyata keçirilməsi.
Dünya dəyişir. Artıq Qazaxıstan da bizə müsbət nümunələr yaradır. Azərbaycan da dəyişəcək. Xalqımızın birgə səyləri ilə”.
2019-cu il martın 20-də Qazaxıstanın birinci prezidenti Nursultan Nazarbayev idarəçilikdə müəyyən səlahiyyətləri saxlamaqla istefa verib, Senatın sədri Qasım-Comərd Tokayev prezident andı içərək dövlət başçısı kürsüsünə oturub, həmin il iyunun 9-da prezident seçilib.
2022-ci il yanvarın 5-də Nursultan Nazarbayev idarəçilikdən tam uzaqlaşdırılıb.
