Savaşdan sonra
Əli Kərimli
AXCP sədri
Rusiya – Ukrayna savaşı nə zaman bitəcək? Hansı şərtlərlə? Bu sualların dəqiq cavabını heç kim bilmir. Ancaq bir şey məlumdur: bütün savaşlar kimi bu savaş da bitəcək.
Bəs savaşdan sonra Ukraynanı nə gözləyir?
Əvvəla, müttəfiqləri – ABŞ, Avropa Birliyi, “Böyük 7-lər” Ukraynanın dağılmış şəhərlərini, yaşayış məntəqələrini yüksək səviyyədə bərpa edəcək. Rusiya raketlərinin, bombalarının dağıtdığı Ukrayna şəhərləri savaş bitəndən bir neçə il sonra ən yaxşı Avropa şəhərləri kimi yenidən tikilib qurulacaq.
Savaş nəticəsində tam dağıdılan Ukrayna iqtisadiyyatı müttəfiqlərin yardımı və 100 milyardlarla dollarlıq xarici sərmayə hesabına müasir Qərb texnologiyaları və standartları ilə yenidən qurulacaq.
Ukrayna Avropa Birliyinə tam inteqrasiya edib qurumun üzvü olacaq.
Ukrayna ordusu NATO standartlarına keçib bu alyansın silahları ilə silahlanacaq. Beləliklə, Ukraynanın NATO silahları ilə silahlanmış, yüksək döyüş qabiliyyətli ordusu olacaq.
Təəssüf ki, savaş bitənə qədər Ukrayna çox insan itirəcək, milyonlarla insan ağır məhrumiyyətlər yaşayacaq. Ancaq sonda Ukrayna xalqı demokratik Avropa dövləti olmaq arzusuna qovuşacaq. Dünyada ikinci sayılan ordunun işğal cəhdini dəf etmək Ukrayna xalqına böyük güvən verəcək, ukraynalıların milli qüruru çox yüksələcək.
Bu gün şəhərləri, kəndləri viran qoyulan, 13 milyon vətəndaşı ev-eşiyindən didərgin düşən (6,5 milyon nəfəri ölkəni də tərk edib), 10 minlərlə insanı öldürülən Ukraynanı çox parlaq gələcək gözləyir.
