Əmək və Əhalinin Sosial Müdafiəsi Nazirliyinin hesabatına əsasən, 2022-ci il aprelin 1-nə Dövlət Sosial Müdafiə Fondunda 1 milyon 177,4 min nəfər pensiyaçı qeydiyyatda olub, aylıq pensiyaların orta məbləği 364,4 manata çatıb.

Novator.az bildirir ki, 2021-ci ilin sonuna pensiyaçıların sayı 1 milyon 196,9 min nəfər, aylıq pensiyaların orta məbləği 331 manat göstərilmişdi.

Azərbaycanda kişilər 65, qadınlar 62 yaş yarımda pensiyaya çıxır. 2027-ci il iyulun 1-dək qadınların da pensiya yaşı 65-ə qalxacaq.

Pensiya hüququ üçün ya 25 il sığorta stajı, ya da minimum pensiya kapitalı (hazırda 34560 manatdır) tələb olunur. Əks halda pensiya yaşı çatan şəxsə 180 manat müavinət düşür.

Əmək pensiyasının minimum məbləği 240 manatdır.