Cib boşalır, büdcə dolur
İqtisadçı Rövşən Ağayev rəsmi iqtisadi göstəriciləri şərh edib. Novator.az-ın məlumatına görə, xarici ticarətlə bağlı qiymət indekslərinə nəzər salan ekspert yazır ki, 2022-ci ilin yanvar-mart aylarında idxal malları üzrə qiymətlər ötən ilin ilk rübünə nisbətən 20 faiz artıb: “Əsas məhsul seqmentləri üzrə istehlakının yarısından çoxu xaricdən formalaşan ölkədə 20 faizlik idxal bahalanması inflyasiyanın əhalinin cibini soğan kimi soyması deməkdir. Qiymətlərin belə yüksək artımı vergi tutulan dövriyyəni də şişirdir, hökumət isə vergi artımlarını inflyasiyanın ayağına yazmadan uğurlu iqtisadi siyasəti kimi təbliğ edir.
Ayrı-ayrı mal qrupları üzrə idxal inflyasiyası daha yüksəkdir. Məsələn, heyvan mənşəli mal qrupu üzrə idxal qiymət indeksi 33 faizə yaxın artıb. Ən az artım nəqliyyat vasitələrində qeydə alınıb – 6,5 faiz. Nəqliyyat vasitələrindən vergi mexanizmi isə elə qurulub ki, orada həmişə uduş var: gətirdiyin avtomobilin dəyərinin az qala 60 faizini Azərbaycan gömrüyünə ödəməlisən. Bir tərəfdə insanların cibini boşaldan inflyasiya o biri tərəfdə büdcəni doldurur”.
Dövlət Statistika Komitəsinin rəsmi hesabatına əsasən, yanvar-aprel aylarında istehlak qiymətləri 2021-ci ilin dörd ayına nəzərən 12,4 faiz artıb, ərzaq məhsulları, içkilər və tütün məmulatları 17,4 faiz, qeyri-ərzaq məhsulları 6,4 faiz, əhaliyə göstərilən ödənişli xidmətlər 10,2 faiz bahalaşıb.
