Əziyyətli ölkə
Azərbaycan Demokratiya və Rifah Partiyasının sədri Qubad İbadoğlu Ukrayna qaçqınlarının köç etdiyi ölkələrin siyahısına nəzər salıb. Novator.az-ın məlumatına görə, beynəlxalq statistikaya əsaslanan siyasətçi yazır ki, Polşaya 3,3 milyon, Rumıniyaya 901,6 min, Rusiyaya 800,1 min, Macarıstana 594,6 min, Moldovaya 461,7 min, Slovakiyaya 415,4 min, Qazaxıstana 204 min, Estoniyaya 125 min, Ermənistana 38 min, Belarusa 27,3 min, Gürcüstana 25 min nəfər ukraynalı sığınıb.
Dövlət Miqrasiya Xidməti Ukraynadan Azərbaycana gələnlərin sayını 8,2 min nəfər göstərir.
Qubad İbadoğlu Azərbaycana Ukraynadan az qaçqın gəlməsini bahalıqla bağlayır: “Azərbaycan bahalı ölkədir, bu da həm turistlərin, həm müvəqqəti yaşamaq istəyən qaçqınların sayına təsir göstərir.
Başqa səbəb Azərbaycanda sosial təminat və müdafiə sisteminin zəif və qeyri-effektiv olmasıdır.
Digər səbəbləri də istisna etmirəm.
Azərbaycanda bahalığın və sosial müdafiənin zəif olmasının əziyyətini daha çox aztəminatlı yerli əhali çəkir. Yaşam üçün əlverişsiz şərait isə iqtisadiyyatın neft gəlirlərindən asılılığı, gəlirlərin və sərvətlərin ədalətsiz bölgüsü nəticəsində ifrat təbəqələşmə, pis idarəçilik, inhisarçılıq və korrupsiyadır”.
2014-cü ildə Rusiya Ukraynanın Krım yarımadasını zəbt edərək özünə birləşdirib, Donetsk və Luqansk vilayətlərinin bir hissəsini də tutub.
2022-ci il fevralın 24-dən isə Rusiya Ukraynada total hərbi əməliyyatlar aparır. Yeni işğal dalğasında Donetsk, Luqansk, Xarkov, Xerson, Nikolayev, Zaporojye vilayətlərində bir çox ərazi Rusiyanın nəzarətinə keçib.
