Azərbaycan Demokratiya və Rifah Partiyasının sədri Qubad İbadoğlu prezident İlham Əliyevlə ABŞ-ın dövlət katibi Entoni Blinkenin telefon söhbəti barədə iki informasiyanı müqayisə edib.

Azərbaycan prezidentinin mətbuat xidməti Entoni Blinkenin İlham Əliyevə mayın 11-də zəng vurduğunu açıqlayıb. Qeyd olunub ki, Entoni Blinken mərhum prezident Heydər Əliyevin anadan olmasının 99-cu ildönümü münasibətilə təbriklərini çatdırıb, Azərbaycanla Ermənistan arasında aparılan danışıqları və bu xüsusda sülh sazişinin bağlanmasını dəstəklədiyini vurğulayıb.

Novator.az-ın məlumatına görə, Qubad İbadoğlu yazır ki, telefon söhbətində insan hüquqları probleminə də toxunulub: “ABŞ Dövlət Departamentinin saytında telefon söhbəti barədə fərqli bilgi verilib, dövlət katibinin Azərbaycanda insan hüquqlarına və əsas azadlıqlara hörmətin artırılmasının vacibliyini vurğuladığı qeyd edilib. Azərbaycanda yayılan rəsmi açıqlamada müzakirə olunmuş məsələlər arasından insan haqlarının qorunması və fundamental azadlıqlar məsələsi çıxarılıb. İndiki həssas dövrdə niyə Azərbaycan tərəfi rəsmi məlumatda insan haqlarının qorunması və azadlıqlar məsələsini ixtisara salır? Azərbaycan ictimaiyyətini ən çox maraqlandıran məsələlərdən biri də insan haqlarının qorunması və fundamental azadlıqların təminatıdır. Çünki son zamanlar xüsusilə də ictimai fəallara və jurnalistlərə qarşı zorakılıqlar artıb, həbslər çoxalıb, ölkədə 120-dən çox siyasi məhbus var”.