AXCP sədri Əli Kərimli media azadlığı problemindən yazıb. O qeyd edir ki, hər il ümumi daxili məhsulun 15 faizi qədər vəsaitin xalqdan oğurlanaraq təkcə Böyük Britaniyaya daşındığı ölkədə azad mətbuat ola bilməz: “Azad mətbuatın olduğu ölkədə bu miqyasda talan mümkün deyildi. Ona görə də azad media indeksində Azərbaycanın 154-cü pillədə qərarlaşıb ən qəddar və cahil rejimlərin əhatəsində olması təəccüblü deyil. Təəccüblü o oldu ki, azad mətbuata divan tutmaq sahəsində Azərbaycan Orta Asiyanı da arxada qoyub. Azad media indeksində ölkəmiz 72-cü yerdə olan Qırğızıstandan, 122-ci yerdə olan Qazaxıstandan, 134-cü yerdə olan Özbəkistandan, 152-ci yerdə olan Tacikistandan daha acınacaqlı durumda imiş. Azərbaycan hakimiyyəti mətbuatı əzmək sahəsində Orta Asiyada təkcə Türkmənistandan geri qalır.
Görün 103 il öncə türk-müsəlman dünyasında ilk demokratik cümhuriyyəti qurmuş, 34 il öncə dünyada ilk dəfə 18 gün gecə-gündüz oturaq mitinq keçirmiş, 33 il öncə dünyada ilin xalqı elan olunmuş bir xalqı Əliyevlər hakimiyyəti hansı acınacaqlı vəziyyətə salıb.
Heç kim “Mətbuat azadlığından mənə nə, mən siyasətə qarışmıram” deməsin. Ölkəmizin indiki hüquqsuz vəziyyətə düşməsinə görə əsas məsuliyyət Əliyevlər hakimiyyətinin üzərində olsa da, “Demokratiyadan, söz azadlığından, azad seçkidən mənə nə?” deyib repressiyalara imkan verən, dövlətinin, millətinin, özünün taleyinə biganə olan çoxsaylı soydaşımız da bu vəziyyətə görə məsuliyyət daşıyır. Hüquqsuzluqdan, cəngəllik qaydaları ilə idarə olunmaqdan xilas olmağın ilk addımı məsuliyyətli vətəndaş olmaqdır. O ilk addımı ataq, oğru hakimiyyətin xalqımızın danışan dilini, görən gözünü bağlamasına biganə qalmayaq. Heç olmasa sosial şəbəkələr, internet televiziyaları vasitəsilə həqiqətləri yayaq və hüquqsuzluğa etiraz edək!”
1993-cü ildə BMT-nin təşəbbüsü ilə mayın 3-ü dünyada Mətbuat Azadlığı Günü kimi rəsmiləşib. 2022-ci il mayın 3-də “Sərhədsiz reportyorlar” beynəlxalq təşkilatı media azadlığı reytinqi açıqlayıb. Azərbaycan 180 ölkə arasında 154-cü yerdə göstərilir.
Novator.az-ın məlumatına görə, Estoniya 4-cü, Litva 9-cu, Latviya 22-ci, Moldova 40-cı, Ermənistan 51-ci, Qırğızıstan 72-ci, Gürcüstan 89-cu, Ukrayna 106-cı, Qazaxıstan 122-ci, Özbəkistan 133-cü, Türkiyə 149-cu, Tacikistan 152-ci, Belarus 153-cü, Rusiya 155-ci, Türkmənistan 177-ci, İran 178-cidir.
1985-ci ildə yaradılan, mərkəzi qərargahı Fransanın paytaxtı Parisdə olan “Sərhədsiz reportyorlar” 2002-ci ildən media azadlığı reytinqi tərtib edir.
2002-ci ilin hesabatında Azərbaycan 101-ci yerdə olub. 2003-cü ildə ölkə 113-cü yerə, 2004-cü ildə 136-cı yerə, 2005-ci ildə 141-ci yerə geriləyib.
2006-cı ilin reytinqində Azərbaycan 135-ci yerdə göstərilib. 2007-ci ildə ölkə 139-cu yerdə, 2008-ci ildə 150-ci yerdə, 2009-cu ildə 146-cı yerdə, 2010-cu ildə 152-ci yerdə, 2011-2012-ci illərdə 162-ci yerdə qərar tutub.
2013-cü ildə Azərbaycan 156-cı yerdə olub, 2014-cü ilin reytinqində 160-cı, 2015-ci ilin reytinqində 162-ci, 2016-cı ilin reytinqində 163-cü yerə düşüb.
2017-ci ildə Azərbaycan 162-ci olub, 2018-ci ilin hesabatında 163-cü pillədə, 2019-cu ilin hesabatında 166-cı pillədə, 2020-ci ilin hesabatında 168-ci pillədə, 2021-ci ilin hesabatında 167-ci pillədə yer alıb.
