Karantin uzanır, maska tələbi qalxır
Nazirlər Kabineti koronavirus infeksiyasına görə tətbiq olunan xüsusi karantin rejimini iyulun 1-dək uzadıb. Rejim mayın 1-də başa çatmalı idi.
Aprelin 22-də verilən qərar həmçinin mayın 1-dən tənəffüs yollarını qoruyan fərdi vasitələrdən (tibbi maska, parça maska, respirator və s.) istifadə tələbinin ləğvini nəzərdə tutur.
2019-cu ilin dekabrında Çində üzə çıxıb dünyanı bürüyən koronavirus infeksiyasına Azərbaycanda ilk yoluxma 2020-ci il fevralın 28-də qeydə alınıb. Son ümumi hesabata görə, 792445 nəfər koronavirusa yoluxub, onların 9707-si vəfat edib, 135-i aktiv xəstədir, qalanları müalicə olunaraq sağalıb.
2020-ci il martın 31-dən hökm sürən xüsusi karantin rejimi çərçivəsində yasaqlardan biri ictimai yerlərdə, o cümlədən küçələrdə, bulvarlarda, parklarda və digər yerlərdə şəxslərin (yaxın qohumlar, yəni ata-ana, nənə-baba, uşaqlar və bacı-qardaşlar istisna olmaqla) 10 nəfərdən artıq qruplarda cəmləşməsidir.
