İki nazirliyin bir cavabı
Azərbaycan Demokratiya və Rifah Partiyasının sədri Qubad İbadoğlu iki nazirliyi “İnformasiya əldə etmək haqqında” qanunu pozmaqda günahlandırır. Novator.az-ın məlumatına görə, siyasətçi yazır ki, aprelin 1-də Maliyyə Nazirliyinə işğaldan azad olunmuş ərazilərin bərpası və yenidən qurulması məqsədilə 2021-ci ilin dövlət büdcəsindən ayrılmış vəsaitlər barədə, Rəqəmsal İnkişaf və Nəqliyyat Nazirliyinə həmin bölgələrdə 2021-ci ildə həyata keçirilmiş layihələr barədə sorğular verib: “İnformasiya əldə etmək haqqında” qanunun 9-cu maddəsinə əsasən, dövlət orqanları və bələdiyyələr informasiya sahibləri hesab olunur. 10-cu maddədə yazılır ki, informasiya sahibi öz informasiya ehtiyatlarından hər kəsin sərbəst, maneəsiz və hamı üçün bərabər şərtlərlə informasiya əldə etmək hüququnu təmin etməyə borcludur. 24-cü maddədə qeyd olunur ki, informasiya sorğusu ən qısa müddətdə, lakin 7 iş günündən gec olmayaraq icra edilir.
Bütün bunlar qanunun tələbləridir, qanunda informasiya sorğusunu icra etməyən dövlət orqanının məsuliyyəti də müəyyələşdirilib. Bununla əlaqədar dəfələrlə məhkəmələrə müraciət etsək də, məhkəmələr də sorğuya cavab verməyən dövlət orqanlarını haqlı çıxarır.
Ölkənin iki nazirliyinə təqdim etdiyimiz sorğuların əsas məqsədi işğaldan azad edilmiş ərazilərdə xərclənən vəsaitlərlə bağlı məlumat almaqdır. Müraciət etdiyimiz dövlət orqanlarının hər ikisi qanunu pozur. Maliyyə Nazirliyi sahibi olduğu informasiyanı vermir ki, onu büdcə sənədlərində açıqlayacaq, Rəqəmsal İnkişaf və Nəqliyyat Nazirliyi ona görə imtina edir ki, informasiyanı işğaldan azad edilmiş ərazilərə məsul Əlaqələndirmə Qərargahına verir.
Hər iki nazirlik sorğunu cavablandırmaqdan imtina edir. Bu, “İnformasiya əldə etmək haqqında” qanunu ayaq altına atıb tapdamaqdır.
Nazirliklər işğaldan azad edilmiş ərazilərdə xərclənən vəsaitləri gizlətməyə çalışır. Nədən? İşğaldan azad edilmiş ərazilərdə xərclənən vəsaitlərin istifadəsində korrupsiya yoxdursa, bu məlumatları niyə gizlədirlər?”
Qubad İbadoğlu iqtisad elmləri namizədi, London İqtisadiyyat Məktəbinin professorudur. 2015-ci ildə Azərbaycan Demokratiya və Rifah Hərəkatını qurub, 2021-ci ildə həmin qurumun bazasında partiya yaradılıb.
