Üç ay, 2795 cinayət
2022-ci ilin yanvar-mart aylarında hüquq mühafizə orqanları 2795 narkotik cinayəti aşkarlayıb. Məlumatı yayan Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyası qeyd edir ki, faktların 1010-u narkotik vasitələrin qanunsuz satışı, 1748-i narkotik vasitələrin qanunsuz əldə edilib saxlanması, 16-sı qanunsuz olaraq narkotik xassəli bitkilərin kultivasiyası, 21-i bu kateqoriyadan olan digər cinayətlərlə bağlıdır.
Hesabata görə, aşkarlanmış faktlar üzrə qanunsuz dövriyyədən ümumilikdə 1 ton 880 kiloqramdan çox narkotik vasitə və psixotrop maddə müsadirə olunub, 1732 nəfər cinayət məsuliyyətinə cəlb edilib.
Novator.az bildirir ki, Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasına baş nazirin müavini Əli Əhmədov sədrlik edir. Daxili işlər naziri Vilayət Eyvazovun sədr müavini olduğu qurumda Prezident Administrasiyasının, Milli Məclisin, Nazirlər Kabinetinin, Baş Prokurorluğun, mərkəzi və yerli icra hakimiyyəti orqanlarının rəsmiləri və başqaları yer alır.
