Prokurorluğun sorğusu, Konstitusiya Məhkəməsinin şərhi
Respublika Prokurorluğunun sorğusunu əsas götürən Konstitusiya Məhkəməsinin Plenumu Cinayət Məcəlləsinin 16 və 75-ci maddələrini əlaqəli şəkildə şərh edib. Qərara əsasən, 16 və 75-ci maddələrin tələbləri baxımından hər bir cinayətə görə məsuliyyətə cəlb etmə müddəti müstəqil hesablandığından eyni və yaxud həmcins cinayətlərin təkrar törədilməsi zamanı əvvəlki əmələ görə cinayət məsuliyyətinə cəlb etmə müddəti keçdiyi halda ikinci əməl təkrarlıq yarada bilməz: “Təkrar oğurluqdan əvvəl törədilmiş ilkin əməl üzrə İnzibati Xətalar Məcəlləsinin 38.1-ci maddəsində nəzərdə tutulmuş bir illik müddətin keçməsi Cinayət Məcəlləsinin 177.2.2-ci maddəsi ilə cinayət məsuliyyətinin yaranmasını istisna edir”.
Novator.az bildirir ki, Cinayət Məcəlləsinin 16-cı maddəsinə görə, cinayət məsuliyyətindən azad olunmuş şəxsin məcəllənin eyni bir maddəsi ilə nəzərdə tutulmuş və ya xüsusi hissəsində birbaşa göstərilən hallarda müxtəlif maddələri ilə nəzərdə tutulmuş cinayəti yenidən törətməsi cinayətin təkrar törədilməsi sayılmır.
75-ci maddəyə görə, az ağır cinayətin törədildiyi gündən yeddi il keçdikdə şəxs cinayət məsuliyyətinə cəlb edilə bilməz.
177.2.2-ci maddəyə görə, oğurluq, yəni özgənin əmlakını gizli olaraq talama təkrar törədildikdə bir ildən üç ilədək müddətə azadlığın məhdudlaşdırılması və ya iki ildən beş ilədək müddətə azadlıqdan məhrumetmə ilə cəzalandırılır.
İnzibati Xətalar Məcəlləsinin 38.1-ci maddəsinə əsasən, xırda talamaya görə inzibati tənbeh inzibati xətanın törədildiyi gündən ən geci bir il keçənədək verilə bilər.
