Korrupsiyaya qarşı mübarizə: yeni plan
Aprelin 4-də sərəncam imzalayan prezident İlham Əliyev korrupsiyaya qarşı mübarizə üzrə milli fəaliyyət planını təsdiqləyib. Plan 2022-2026-cı illəri əhatə edir.
Sərəncama görə, mərkəzi və yerli icra hakimiyyəti orqanları, dövlət mülkiyyətində olan və paylarının (səhmlərinin) nəzarət zərfi dövlətə məxsus olan hüquqi şəxslər, həmçinin dövlət adından yaradılmış publik hüquqi şəxslər hər il dekabrın 30-dək Nazirlər Kabinetinə və Korrupsiyaya Qarşı Mübarizə üzrə Komissiyaya planda nəzərdə tutulan tədbirlərin icrası barədə illik hesabat verməlidir. Ali Məhkəməyə, Baş Prokurorluğa, Məhkəmə-Hüquq Şurasına, ombudsmana, Mərkəzi Banka və Hesablama Palatasına, habelə bələdiyyələrin milli assosiasiyalarına tədbirlərin icrasını təmin etmək tövsiyə olunub.
Novator.az bildirir ki, Korrupsiyaya Qarşı Mübarizə üzrə Komissiya 3 mart 2004-ci ildə yaradılıb. 15 nəfərlik qurumun 5 üzvünün təyinatı prezidentin, 5 üzvünün təyinatı Milli Məclisin, 5 üzvünün təyinatı Konstitusiya Məhkəməsinin səlahiyyətindədir.
