Amerikalılar beynəlxalq siyasətdə kimə inanır?
Amerikalıların 72 faizi beynəlxalq siyasətlə bağlı məsələlərdə Ukrayna prezidenti Vladimir Zelenskiyə etimadla yanaşır. Novator.az-ın məlumatına görə, bunu ABŞ-ın “Pyu” Araşdırma Mərkəzinin (Pew Research Center) keçirdiyi sorğu göstərib.
Beynəlxalq siyasi məsələlərdə Fransa prezidenti Emmanuel Makrona etmadla yanaşan amerikalıların sayı 55 faiz təşkil edib.
ABŞ prezidenti Cozef Baydenə sorğu iştirakçılarının 44 faizi, Çin Xalq Respublikasının sədri Si Cinpinə isə 15 faizi beynəlxalq siyasi məsələlərdə etimad göstərdiyini bildirib.
Beynəlxalq siyasətdə Rusiya prezidenti Vladimir Putinə etimadla yanaşan amerikalıların sayı cəmi 6 faiz olub.
Sorğu orta və ahıl yaşlı amerikalıların gənclərlə müqayisədə Vladimir Zelenskiyə beynəlxalaq siyasətdə daha etimadla yanaşdığını, eyni zamanda amerikalıların 77 faizinin beynəlxalq siyasi məsələlərdə Vladimir Putinə qətiyyən inanmadığını üzə çıxarıb.
Mənbə: Pewresearch.org
