Demokratiya fürsəti
Azər Qasımlı
Azərbaycanın ən köklü problemi xalqın öz rəhbərlərini, parlamentini seçə bilməməsi və ölkədə azad iqtisadi mühitin olmamasıdır. Hamı üçün bərabər fürsətlərin açılması və demokratiyanın qalib gəlməsi üçün iki vacib şərtə ehtiyac var: demokratik təsisatların formalaşması; hakim siyasi-iqtisadi-mədəni elitanın dəyişməsi.
İki dəfə demokratiya şansımız olub. 1918 və 1991-ci illərdə. İlk fürsətdə bunu etmək mümkün olmadı, Rusiya ölkəmizi işğal etdi. İkinci cəhd də alınmadı.
Hər iki demokratik fürsət tektonik geosiyasi dəyişikliklə, Rusiya imperiyasının və SSRİ-nin süqutu nəticəsində yaranmışdı.
Bu gün Ukraynada gedən savaş sonucunda Putinin hakimiyyətdən getməsi və ya Rusiyanın təcrid olunması Azərbaycanda demokratik dəyişikliyə yol açacaq. Azərbaycan xalqının əsas missiyası bu dəyişikliyi həyata keçirməkdir. Cəmiyyətimizin əsas işi bu olmalıdır.
1918-də də, 1991-də də Ermənistan başqa ölkələrin yardımı ilə işğalçı siyasət yürütdü, müharibəyə, kinə və şiddətə yol açdı. Cənubi Qafqazı geriyə salan, ayağımızdan dartan əsas faktorlardan biri bu oldu.
Cənubi Qafqaz dövlətlərinin suverenliyi və inkişafı bölgədə sülhü qorumaqdan, əməkdaşlıqdan, kənar ölkələrin əlində alət olmamaqdan asılıdır. Azərbaycan, Gürcüstan və Ermənistanın müstəqilliyi, ərazi bütövlüyü və sərhədlərinin toxunulmazlığı əsas sabitləşdirici faktordur. Bu siyasətin əksi heç kimə qazanc gətirməyəcək.
İndiki həssas dönəmdə hamımızın üzərində böyük məsuliyyət var. Tarixi məsuliyyətimizi dərk etməli və buna görə davranmalıyıq. Əminəm ki, keçmiş SSRİ-dən qalan elitanı yola salmağı bacaracaq, demokratik təsisatları yarada biləcəyik. Demokratiya fürsətini bir daha qaçırmayaq!
Müəllifin başqa yazıları:
