Putin nədə yanılıb? – “The Economist”
Rusiya prezidenti Vladimir Putin Ukraynada müharibəyə başlayarkən üç səhvə yol verib. Böyük Britaniyanın “The Economist” jurnalının dərc etdiyi məqalədə belə deyilir.
Novator.az-ın məlumatına görə, məqalədə bildirilir ki, Rusiya lideri Ukraynanı yetərincə qiymətləndirməyib, öz ordusunu düzgün idarə edə bilməyib və Qərbin bu müharibəyə verəcəyi reaksiyanı əvvəlcədən dəqiq hesablamağı bacarmayıb: “Putinin ilk səhvi onun qarşı tərəfi lazımınca qiymətləndirməməsidir. Deyəsən, Rusiya prezidenti apardığı təbliğata özünü hamıdan çox inandırıbmış. Axı Putinin fikrincə, Ukrayna – ABŞ-ın Mərkəzi Kəşfiyyat İdarəsinə işləyən, xalqın xor baxdığı möhtəkirlərin idarə etdiyi süni bir dövlətdir”.
Məqalədə vurğulanır ki, Putin Ukraynanın hərbi əməliyyatın elə ilk günlərindəcə təslim olacağını zənn edirdi, amma hadisələr göstərdi ki, o, ciddi yanılıb.
“Putinin ikinci səhvi öz ordusunu düzgün idarə etməməsidir” yazan jurnal bildirir ki, Rusiyanın Hərbi Hava Qüvvələri hələ də Ukrayna səmasına hakim ola bilməyib: “Putin oz xalqını inandırmağa çalışırdı ki, Rusiya Ukraynada müharibə aparmır, “neonasizmin kökünü kəsməyə çalışır”. Rus əsgərlər Ukraynaya girəndə xalqın onları xilaskar kimi qarşılayacağını gözləyirdi. İndi Putin ukraynalıları kütləvi şəkildə qırmağı əmr etsə, ordu bu əmrə tabe olmaya bilər”.
Jurnal Putinin öz ordusunun itkilərini rusiyalılardan gizlətməyə çalışdığını, ancaq bunu axıradək gizlədə bilməyəcəyini də qeyd edir.
Məqalədə daha sonra deyilir: “Putinin üçüncü səhvi onun Qərbi yetərincə dəyərləndirməməsidir. Çox güman ki, Rusiya lideri Ukraynaya verilən güclü dəstəyə, britaniyalıların Ukraynanın dövlət himni qarşısında ayağa qalxmasına, Berlində Brandenburq qapısının Ukraynanın dövlət bayrağı rəngində işıqlandırılmasına mat-məəttəl qalıb”.
Jurnal yazır ki, Qərb hökumətləri ukraynalıların cəsarətindən ruhlanaraq Rusiyaya sanksiyaları daha da sərtləşdirməkdədir. “The Economist” sanksiyaların Rusiya iqtisadiyyatını çökdürməyə qadir olduğu qənaətindədir.
Mənbə: Economist.com
