Dörd ilin bir kursu
Mərkəzi Bank martın 5-də ABŞ dollarının məzənnəsini yenə 1,7 manat müəyyən edib. Bu kurs martın 9-dək qüvvədə olacağından qiymət sabitliyinin 4 ili tamamlanır.
2015-ci ilin devalvasiyalarında dolların rəsmi kursu 0,7844 manatdan 1,5594 manata yüksəlib, 2016-cı ildə qiymət 1,7707 manata çatıb. 2017-ci ili 1,7001 manatla yola salan dollar 2018-ci il martın 7-dən banklara 1,7 manata təklif olunur.
Novator.az bildirir ki, Dövlət Neft Fondu Mərkəzi Bankın 2022-ci ilin yanvar-fevral aylarında keçirdiyi valyuta hərraclarında 1 milyard 98,2 milyon ABŞ dolları məbləğində vəsait satıb. Yanvarın hərraclarında fonddan 727 milyon dollar, fevralın hərraclarında 371,2 milyon dollar alınıb.
Analoji xərc 2016-cı ildə 4,9 milyard, 2017-ci ildə 3,6 milyard, 2018-ci ildə 6,5 milyard, 2019-cu ildə 6,6 milyard, 2020-ci ildə 7,3 milyard, 2021-ci ildə 6,7 milyard dollar göstərilib.
