Dini etiqad: qanun yenilikləri parlamentdən keçdi
Parlamentin 25 fevral iclasında “Dini etiqad azadlığı haqqında” qanunda yeniliklər layihəsi son oxunuşda qəbul olunub. Novator.az bildirir ki, qanunun 8-ci maddəsində yeniliyə görə, islam dininə aid ibadət yerlərinə və ziyarətgahlara din xadimlərini Qafqaz Müsəlmanları İdarəsinə məlumat verməklə dövlət təyin edəcək.
9-1-ci maddədə yeniliyə əsasən, dini qurumun hüquqi ünvanı dəyişdikdə dövlətə bu barədə 10 gün müddətində məlumat verilməlidir.
12-ci maddədə dəyişikliyə görə, dini qurumlar dövlət qeydiyyatına alınması üçün təsis protokolu, nizamnaməsi, habelə “Hüquqi şəxslərin dövlət qeydiyyatı və dövlət reyestri haqqında” qanunda nəzərdə tutulmuş digər sənədlər əlavə olunmuş ərizə ilə müraciət edir. Dini icmaların təqdim etdiyi ərizəyə onu təsis etmiş azı əlli nəfər yetkinlik yaşına çatmış şəxs və ya onların səlahiyyətli nümayəndələri, habelə vətəndaşlığı, yaşayış yeri və doğum tarixi göstərilməklə dini icmanı təsis edən şəxslərin siyahısı, şəxsiyyətlərini təsdiq edən sənədlərin surəti, dini təlimin əsasları, o cümlədən dini icmanın yaranması tarixi, onun fəaliyyətinin forma və metodları, ənənələri, ailəyə, nikaha və təhsilə münasibət, həmin icmanın üzvlərinin hüquq və vəzifələrinə qoyulan məhdudiyyətlər barədə məlumatlar əlavə olunmalıdır.
18-ci maddəyə edilən əlavəyə görə, dini qurumların ianələri yalnız ənənəvi üsullarla deyil, bank, poçt, plastik kart, elektron ödəmə sistemləri, yaxud internet vasitəsilə qəbul edilə bilər.
