Karantin maya getdi
Nazirlər Kabineti xüsusi karantin rejimini mayın 1-dək uzadıb. Rejim martın 1-də başa çatmalı idi.
2020-ci il martın 31-dən hökm sürən rejim koronavirus infeksiyasını cilovlamaq üçün tətbiq olunur. Ölkə ərazisinə giriş-çıxışa, mədəniyyət ocaqları, istirahət və əyləncə məkanları, ictimai iaşə obyektlərinin işinə, şənlik mərasimlərində iştirakçı sayına məhdudiyyətlər var.
Dəfn istisna olmaqla yas mərasimləri, kütləvi tədbirlər, ictimai yerlərdə 10 nəfərdən artıq qruplarda cəmləşmək yasaqdır.
2019-cu ilin dekabrında Çində üzə çıxıb dünyanı bürüyən koronavirus infeksiyasına Azərbaycanda ilk yoluxma 2020-ci il fevralın 28-də qeydə alınıb. Son ümumi hesabata görə, Azərbaycanda 781538 nəfər koronavirus infeksiyasına yoluxub, onların 9330-u vəfat edib.
