Jurnalistlər üçün media savadlılığı mövzusunda təlim keçirilib
Mingəçevir şəhərində jurnalistlər üçün “Media savadlılığı” mövzusunda təlim keçirilib.
Təlimdə Mingəçevir şəhəri və ətraf bölgələrdə fəaliyyət göstərən media nümayəndələri iştirak ediblər.
Filologiya üzrə fəlsəfə doktoru, media nəzəriyyəçisi Almaz Mahmud jurnalistlərə media savadlılığı, sosial mediada etik davranış qaydaları və KİV nümayəndələrinə gündəlik fəaliyyətləri zamanı ortaya çıxan, mübahisə doğuran məsələlərlə bağlı məlumat verib. Təlimdə xüsusilə media savadlılığı nədir və niyə bu qədər aktualdır kimi suallara cavab tapmağa çalışılıb.
Etibarlı informasiya mənbəyi seçiminin necə olması və informasiya bolluğunda jurnalistin davranış qaydası haqqında məlumat verilib. Jurnalistlərin sosial şəbəkələrdəki roluna diqqət çəkilib. Almaz Mahmud sosial medianın jurnalistlər üçün funksiyasından, istifadə formalarından və orada yayılan informasiyadan hansı formada istifadə etdiyi haqqında məlumat verib. O, sosial mediada jurnalistlərin etik davranış kodeksinə əməl edilmədən paylaşılan məlumatlara nümunələr göstərib.
Təlimin sonunda jurnalistin peşə fəaliyyəti ilə uzlaşmayan sosial şəbəkə paylaşımları arasında olan uyğunsuzluğun aradan qaldırılması üçün bir neçə çıxış yolu (etik kodeksə riayət olunması, auditoriyanın etibarının qazanılması, həmkarlar qarşısında məsuliyyətin dərk edilməsi, müəllif və redaksiya müstəqilliyinin saxlanması) təklif edilib.
Daha sonra təlimdə iştirak edən jurnalistlərin sualları cavablandırılıb.
