Müdafiə naziri mülki şəxs olsun
Respublikaçı Alternativ Partiyasının Siyasi Komitəsinin üzvü Natiq Cəfərli müdafiə nazirinin mülki şəxs olmasını təklif edir. Novator.az-ın məlumatına görə, siyasətçi yazır ki, Azərbaycan Ordusu xalqın ordusu, ən güvənilən, ən hörmətli qurumlardan biridir: “44 günlük Vətən savaşında ordu üzümüzü ağ elədi, qəddimizi dikəltdi, bizə qürur yaşatdı. İkinci Qarabağ savaşında qələbənin memari Azərbaycan əsgərləri, ordumuzun zabitləridir.
Ordunun ətrafında baş verən bəzi hadisələr təəssüf doğurur, amma bir ümid də yaranır ki, təmizləmə işləri aparılacaq. “Tərtər işi”ndəki işgəncələrdə əli olan bütün zabitlər, vəzifəli şəxslər cəzalandırılmalı, korrupsiya əməlləri ciddi araşdırılaraq bütün şəbəkə çökdürülməli, Azərbaycan Ordusu xoşagəlməz əməllərdən, şəxslərdən təmizlənməlidir.
Struktur islahatlarının da zamanı yetişib. Müdafiə naziri postuna mülki şəxs təyin olunmalı, orduya vətəndaş nəzarətinin formalarından biri kimi nazir institutundan istifadə edilməlidir. Mülki müdafiə naziri vətəndaş cəmiyyəti və media ilə daha açıq və şəffaf dialoq qura bilər. Ordunun hərbi idarəetməsi isə Baş Qərargaha tapşırılmalıdır.
Ölkənin bütün sahələrində institusional addımların zamanı çoxdan çatıb, hətta keçib də – idarəetmə şəxslərə deyil, institutlara fokuslanmalıdır”.
Müdafiə Nazirliyi dövlət müstəqilliyinin bərpa olunduğu 1991-ci ildə yaradılıb. İlk iki müdafiə naziri hərbçilər olub: Valeh Bərşadlı, Tacəddin Mehdiyev.
1992-ci il fevralın 24-də polis zabiti Tahir Əliyev müdafiə naziri təyin edilib.
Həmin il martın 17-dən 1993-cü il fevralın 20-dək müdafiə nazir postunu mülki şəxs tutub: Rəhim Qazıyev.
Sonrakı üç müdafiə naziri hərbçilər olub: Dadaş Rzayev, Məmmədrəfi Məmmədov, Səfər Əbiyev.
22 oktyabr 2013-cü ildən müdafiə naziri postunda çalışan Zakir Həsənov da hərbçidir.
