Rusiyalıların 47 faizi maaşını dollar və ya avro ilə almaq istərdi
Rusiyalıların 47%-i maaşını dollar və ya avro valyutalarının kursuna uyğun almaq istərdi. Bunu Rusiyanın Superjob.ru portalı nəzdindəki Tədqiqat Mərkəzinin keçirdiyi sorğu göstərib.
Novator.az xəbər verir ki, sorğu yaşı 18-dən yuxarı olan 1600 nəfər arasında aparılıb.
Maaşını xarici valyutada almaq istəyənlər arasında kişilərin sayı (55%) qadınlardan (41%) çox olub.
Yaşı 35-dən aşağı olan respondentlərin 56%-i, gəliri 80 min rublu (1763 manat) ötən respondentlərin isə 51%-i maaşını dollar və ya avroyla almaq arzusuna şərik çıxıb.
Sorğunu aparan Tədqiqat Mərkəzinin analitikləri rusiyalıların öz əmanətlərini daha çox dollar və avro valyutasında saxlamağa üstünlük verdiyini qeyd edir. Eyni zamanda son bir ildə dollarla əmanəti olanların sayının 11%-dən 16,4%-ə, avro ilə əmanəti olanların sayının isə 6%-dən 11%-ə yüksəldiyi bildirilir.
2015-ci ildə rusiyalıların 32%-i, 2020-ci ildə 37%-i maaşını dollar və ya avronun kursuna uyğun almaq istədiyini bildirmişdi. Hazırda bu göstəricinin 47% olması maaşını dollar və ya avro ilə almağı arzulayanların sayının ildən-ilə artdığından xəbər verir.
Mənbə: Rbc.ru
